 |
| Í forgrunni eru meðlimir leikmannareglunnar í hátíðabúningi sínum. Í efri röð er Davíð biskup ásamt tveim prestum. |
Á Þorláksmessu 20. júlí síðastliðinn gaf Davíð biskup út bráðabirgðareglur um stofnun Leikmannafélags heilags Þorláks. Tilgangur félagsins er efling kristilegs lífs í þjóðfélaginu í samræmi við guðslög og lög kirkjunnar með hliðsjón af heilögu lífi og fordæmi heilags Þorláks Þórhallssonar (1133-1193), sjötta Skálholtsbiskups og verndardýrling Íslands.
Félagið stuðlar meðal meðlima sinna og almennings að dýrkun heilags Þorláks með því að efla þekkingu á ævisögu hans, kenningum, lifnaðarháttum og útbreiðslu dýrkunar hans gegnum aldirnar. Félagið tekur virkan þátt í bænahaldi og athöfnum sem kirkjan stendur fyrir, dýrlingnum til heiðurs.
Meðlimir félagsins skuldbinda sig í eitt ár í senn frammi fyrir þjóni kirkjunnar að:
- Samræma líf sitt við kenningar kirkjunnar og vera virkir í trúariðkun sinni samkvæmt boðum Guðs og kirkjunnar.
- Hlýða á heilaga messu á sunnudögum og lögboðnum helgidögum.
- Skrifta reglulega og meðtaka altarissakramentið oft.
- Mæta í heilaga messu á hátíðisdögum dýrlingsins, 20. júlí og 23. desember.
- Biðja nóvenubænir heilags Þorláks í níu daga fyrir hátíðisdaga hans.
- Klæðast hátíðabúningi félagsins í messunni á þessum tveimur hátíðisdögum en einnig á dýradegi, einkum í skrúðgöngunni, og við sérstök tækifæri í samráði við yfirvöld kirkjunnar.
- Leitast við að taka að sér eftir getu eitt hlutverk í safnaðarlífi að fengnu samþykki stjórnar félagsins og sóknarprestsins.
