Heilög Teresa af Lisieux – 100 ár síðan hún var tekin í tölu heilagra
Á þessum degi, 17. maí árið 1925 tók Píus páfi XI unga Karmelítasystur frá Frakklandi í tölu heilagra. Hún hafði dáið aðeins 24 ára gömul úr berklum og aldrei yfirgefið klaustur sitt eftir að hún gekk í það fimmtán ára að aldri. Engu að síður hafði saga hennar og skrif snert hjörtu milljóna. Nafn hennar var heilög Teresa af Jesúbarninu og Hinu heilaga andliti – eða einfaldlega Teresa af Lisieux.
Líf í einsemd – en í eldi kærleikans
Marie Françoise-Thérèse Martin fæddist í bænum Alençon í Normandí árið 1873 og ólst upp á afar trúuðu heimili. Foreldrar hennar, Lúðvík og Silja Martin, voru síðar bæði tekin í tölu heilagra, fyrst hjóna í sögunni til þess. Teresa missti móður sína ung og sóttist ávallt eftir andlegri huggun og dýpri tengslum við Guð. Fjölskylda hennar flutti til Lisieux og þar vaknaði með henni köllun til Karmelítareglunnar. Á barnsaldri var hún ákveðin í að ganga í klaustur, og með sérstöku leyfi varð hún að lokum hluti af Karmelítaklaustrinu í Lisieux. Hún tók sér heitið Teresa af Jesúbarninu og Hinu heilaga andliti og helgaði líf sitt bæn og fórnfýsi.
Hin litla leið
Það sem gerir Teresu sérstaka eru ekki stórbrotin ytri verk, heldur „litla leiðin“ sem hún lýsti í skrifum sínum. Í stað þess að leitast við að vinna mikilfengleg afrek í trúnni, kenndi hún að maður gæti orðið heilagur með því að gera lítil verk með miklum kærleika. Þetta var lífsregla hennar: að brosa þegar hana langaði ekki til þess, að þvo leirtauið af kærleika, að þegja þegar löngunin til að svara var sterkust – allt fyrir Guð.
Eftir andlát hennar árið 1897 gaf klaustrið út ævisögu hennar sem hún hafði skrifað að beiðni nunnunnar móður Agnesar. Bókin, Saga sálar, varð metsölubók og dreifðist út um allan heim. Hundruð þúsunda, jafnvel milljónir, fundu í henni leiðsögn í eigin lífi – og trú. Bróðir Sigurður Stefán Helgason í Leikmannareglu Karmels þýddi bókina á íslensku og hún er fáanleg í verslun Karmelsystra í klaustrinu í Hafnarfirði.
Dýrlingur fyrir samtímann
Árið 1925 var hún tekin í tölu heilagra, eins og áður segir aðeins 28 árum eftir dauða hennar. Árið 1997 lýsti Jóhannes Páll II hana kirkjufræðara – eina af aðeins fjórum konum í sögunni sem hlotið hafa þann heiður. Hann nefndi hana „sérfræðing í vísindum kærleikans“. Teresa hefur orðið verndardýrlingur margvíslegra hópa: trúboða, barna, sjúkra og þeirra sem hafa misst trúna tímabundið. Hún er einnig verndardýrlingur Frakklands ásamt heilagri Jóhönnu af Örk. Fólk um allan heim lítur til hennar sem tákns einfaldleika, trúartrausts og kærleika sem umbreytir tilverunni.
Bæn
Heilaga Teresa, litla blóm, hjálpaðu okkur að finna þína litlu leið.
Kenndu okkur að treysta Guði eins og barn,
að gera lítil verk með miklum kærleika
og að gefa okkur í hendur þess sem elskar okkur mest.
Amen.