Borgin Como, þar sem heilagur Abbondio þjónaði sem biskup, stendur við samnefnt vatn, Lago di Como, sem margir telja eitt fegursta stöðuvatn Evrópu. Hér speglast snæviþaktir Alpafjallatindar í djúpbláu vatninu. Gömul hús og steinlagðar götur hlykkjast meðfram vatnsbakkanum og upp hlíðarnar þar sem ólífutrén standa hljóð í miðdegishitanum. Í fjarska gnæfa kirkjuturnar og klausturveggir, og einna mest áberandi er San Abbondio kirkjan, rómatísk og róandi í öllum sínum einfaldleika. Hún stendur örlítið utan borgarmúrsins, hljóð í grænu landslagi, sem væri hún í sífelldri íhugun.
Heilagur Abbondio, sem var biskup í borginni á 5. öld er dýrlingur bæði kaþólskra og rétttrúnaðarkirkna. Hann var útnefndur biskup Como-borgar, líklega um miðja 5. öld, og varð þekktur fyrir hlýju sína, einlæga trú og dugnað í að styðja kirkjuna í þeim umbrotum sem fylgdu falli Rómaveldis. Hann var ekki aðeins andlegur leiðtogi, heldur einnig vel metinn friðarsinni og málamiðlari í samfélagi sem stóð frammi fyrir pólitískum og trúarlegum deilum.
Abbondio tók virkan þátt í baráttu gegn aríusarvillunni, villukenningu sem hafnaði guðdómi Krists. Hann tók þátt í kirkjuþinginu í Mílano árið 452, sem hafði það að markmiði að verja réttan skilning á eðli Krists samkvæmt kenningum kaþólsku kirkjunnar. Þar var hann öflugur stuðningsmaður kenninga heilags Leós páfa mikla.
Helgur vilji heilags Abbondio og vitnisburður hans hefur lifað með kirkjunni allt fram á okkar daga. San Abbondio kirkjan er byggð á 11. öld, og er meðal merkari bygginga í rómönskum stíl á Norður-Ítalíu. Þar eru leifar hans varðveittar, og er kirkjan mikilvægur pílagrímastaður.
Heilagur Abbondio er verndardýrlingur Como og hefur löngum verið talinn fyrirmynd prests sem lifði í samræmi við boðskap fagnaðarerindisins – í trúmennsku, hófsemi og þjónustu við aðra.
Við skulum biðja í dag fyrir þeim sem gegna leiðtogahlutverkum innan kirkjunnar, að þeir megi eiga sér hlýtt hjarta, skýra sýn og einlægan trúarstyrk líkt og heilagur Abbondio.
Heilagur Abbondio, bið þú fyrir oss.
Heimild:
