 |
| Heilög María mey af Kraftaverkameninu |
Í dag fagna Lasaristar af reglu heilags Vinsents af Páli hátíð heilagrar Maríu meyjar af Kraftaverkameninu, sem tengist djúpt og órjúfanlega ævi hinnar auðmjúku reglusystur heilagrar Katrínar Labouré. Frá kapellu Dætra kærleikans af reglu heilags Vinsents af Páli við Rue du Bac 140 í París hefur þessi birting móður Jesú orðið að einni víðfeðmustu og áhrifamestu Maríuhefðum síðari tíma. Í miðju alls er systirin sem Kristur leiddi inn í náðarmikil samtöl við Guðsmóðurina – og ávextir þeirra eru enn að móta trúarlíf milljóna.
Svipmynd: Heilög Katrín Labouré
Katrín Labouré fæddist 2. maí 1806 í Fain-lès-Moutiers í Bourgogne-héraði, um 240 kílómetra suðaustur af París. Þorpið er smátt og umlukið akurlendum. Hún var 9. barnið af 11 systkinum. Þar ólst hún upp á sveitabýli föður síns og frá unga aldri sýndi hún djúpa trú. Heimilið var fátækt en hlýtt, og sveitalífið kenndi henni ábyrgð, vinnusemi og einfaldleika sem síðar varð að hjartslætti köllunar hennar. Móðir hennar lést þegar Katrín var níu ára, og strax á unga aldri leitaði hún huggunar hjá Maríu Guðsmóður. Hefðbundnar frásagnir segja að hún hafi sest við altarið og tekið í hendina á styttu af Maríu með orðum sem hafa fylgt henni allt til enda: „Héðan í frá ert þú móðir mín.“
Katrín var róleg, djúphugul og hlaut litla menntun. En hún hafði næmt hjarta, djúpa hlýju og einkennandi styrk sem endurspeglaðist í þeim atburðum sem síðar urðu. Þegar hún gekk inn í regluna Dætur kærleikans árið 1830 var engan sem grunaði að hún væri kölluð til að verða vitni að einni mikilvægustu opinberun heilagrar Maríu Guðsmóður á 19. öld.
Birtingarnar í Rue du Bac
Sumarið og haustið 1830 urðu þrjár birtingar sem mótuðu líf Katrínar. Hún sá heilagan Vinsent af Páli í sýn og síðan Jesú Krist í guðslíkamahúsi kapellunnar. En það var kvöldið 18. júlí sem María birtist henni í fyrsta sinn: „Kær dóttir mín,“ sagði hún, „Guð vill fela þér ákveðið verkefni.“
Síðan kom hin mikla birting 27. nóvember 1830. María birtist henni sem „Náðardrottning“ og stóð á hnattrænum heimsskautum, með geisla ljóss sem streymdu frá höndum hennar. Umhverfis myndina sást áletrunin sem hefur fylgt meninu síðan: „María, getin án syndar, bið þú fyrir oss er leitum athvarfs hjá þér.“ Katrín lýsti þessu sem friðsamlegu, djúpu og alvarlegu augnabliki þar sem María bað hana um að sjá til þess að men í þessari mynd yrði slegið og borið um allan heim. Greint er frá þessum atburðum nánar í bókinni „Og þú skalt merja hæl þess“ eftir reglubróður leikmannareglu Karmels Jón Rafn Jóhannsson sem fáanleg er í bókaverslun á netinu og í Karmelklaustrinu í Hafnarfirði.
Kraftaverkamenið og áhrif þess
Men þetta var slegið í París 1832, og á næstu árum og áratugum barst það víða um heim. Margir tengdu það strax við vernd, bænheyrslur og lækningar. Það sem einkennir sögu menisins er þögn Katrínar. Hún hvorki leitaði athygli né lét nokkurn vita af því að hún væri sjáandinn annan en skriftaföður sinn, föður Aladel sem sá um að miðla frásögnum hennar. Hún sinnti eldri systkinum í reglunni í áratugi, tók á móti sjúkum, þvoði gólf og sinnti eldhússtörfum allt til dauðadags árið 1876. Það var ekki fyrr en eftir andlát hennar að reglan viðurkenndi opinberlega að hún hefði verið sú sem fékk opinberunina.
Heilagleiki og minning
Katrín Laboure var tekin í tölu heilagra árið 1947 af Píusi páfa XII. Líkami hennar er varðveittur enn þann dag í dag óskaddaður í glerkistu í kapellunni þar sem hún sá Maríu birtast. Þangað sækir fjöldi pílagríma til að biðja, leita fyrirbæna Guðsmóðurinnar og fá frið í hjarta. Ritari þessara orða, sem hefur borið menið frá árinu 1983, sótti kapelluna heim á sunnudegi haustið 2023 og getur borið vitni um þetta. Þar var fjöldi manns, svo mikill að kapellan var yfirfull og það var aðeins hægt að miðla fólki inn þegar einhver fór út. Eftir messuna söfnuðust messugestir að glerkistu heilagrar Katrínar til fyrirbæna.
Lærdómur
Ævi heilagrar Katrínar kennir okkur að guðleg köllun er ekki ávöxtur mikilla athafna heldur trúfesti í hinu smáa. Hún minnir okkur á að stjórnast ekki af frama eða nafnbótum heldur einlægni og hlýðni við vilja Guðs. Í henni birtist þessi djúpa regla: að Guð velur sér oft hina hljóðu og einföldu til að bera fram stærstu skilaboð sín.
Bæn
Heilaga María, móðir okkar, þú sem birtist Katrínu Labouré og færðir heiminum kraftaverkamenið, leið okkur í trú, verndaðu heimili okkar og gefðu okkur hugrekki í þrautum lífsins. Heilaga Katrín, þú sem barst náðina með þögn og auðmýkt, kenndu okkur að treysta Guði í öllu.
Amen.